Ғафурови 28-сола дар ММА ҳамагӣ 25 қувваозмоӣ анҷом дода, дар 19-тоаш пирӯз шуда, дар 6-тоаш шикаст хӯрдааст. Вазнаш 61 кило ва қадаш 1 метру 70 сантиметр.

Риня Накамураи 29-сола дар муҳорибаҳои ММА то ҳоло шикастнопазир аст. Ӯ дар ҳамаи 9 қувваозмоӣ, аз он ҷумла дутоаш дар UFC, дастболо шудааст. Қадаш 1 метру 70 сантиметр, вазнаш 61 кило.

Накамура як размикори хеле ҷолиб мебошад. Вай дорои таҷрибаи ғанӣ дар куштӣ буда, дар ҷараёни рақобат фаъолона кор мекунад ва усулҳои зарбазании баландсифат дорад. Ҷопонӣ айни замон дар ҳолати хуби варзишист ва тасодуфӣ нест, ки UFC ӯро ҳамчун як размикори ояндадор меҳисобад.

Мутахассисони ММА пешбинӣ мекунанд, ки рақобат бо Накамура барои Муин Ғафуров сахту вазнин хоҳад шуд.

Муин Ғафуров 7-уми сентябри соли 2021 дар финали силсилаи номзадҳои Дана Уайт бо Чад Анҷелигери канадагӣ рӯбарӯ шуда буд. Дар сурати пирӯзӣ размикори тоҷик метавонист дар таърих ҳамчун нахустин варзишгар аз Тоҷикистон бо UFC шартнома бандад, вале ӯ дар набарди ниҳоӣ бо тасмими тақсимшудаи доварон шикаст хӯрд.

Муин Ғафуров танҳо баъди қариб ду сол вориди UFC шуд. Вай моҳи июни соли 2023 дар аввалин рақобаташ дар ин ташкилот аз Ҷон Кастанеда (ИМА) бо қарори якдилонаи доварон шикаст хӯрд. Дар моҳи октябри ҳамон сол Ғафуров бори дигар дар UFC ба нокомӣ дучор гашт. Муин аз Саид Нурмагомедови русиягӣ мағлуб шуд.

Ниҳоят, размикори тоҷик моҳи июни соли 2024 аввалин ғалабаи худро дар UFC ба даст овард. Ӯ Куюнг Ҳо Канги кореягиро шикаст дод. Ҳамин тариқ, Муин Ғафуров чаҳорумин размикор аз Тоҷикистон аст, ки ба UFC дохил шудааст.

Бояд зикр намуд, Муин Ғафуров соли 2013 дар мусобиқоти қаҳрамонии ҷаҳон дар риштаи самбои размӣ дар Маскави Русия дар рақобатҳо дар вазни то 62 кило бар ҳамаи рақибонаш пирӯз шуда, ба финал роҳ ёфта буд. Вай дар қувваозмоии ниҳоӣ бар Абзал Абилдашев аз Қазоқистон ғолиб омада, бо медали тилло мукофотонида шуд.

Эмомалӣ Раҳмон, раиси ҷумҳури Тоҷикистон рӯзи 30-уми июл бо Аббос Ароқчӣ, вазири умури хориҷии Эрон дидору гуфтугӯ кардааст. Дафтари матбуоти президент хабар додааст, ки дар мулоқот, “масоили вобаста ба ҳамкории дуҷонибаи тиҷоративу иқтисодӣ дар маркази таваҷҷуҳи ҷонибҳо қарор доштанд.”

Дар баёнияи расмӣ дар ин бора омадааст: “Алоқамандии ҳарду ҷониб ба тавсеаи ҳамкорӣ дар соҳаҳои энергетика, саноат, ҳамлу нақли байналмилалӣ, кишоварзӣ, илму фанноварӣ, тандурустӣ, гардишгарӣ, фарҳанг ва дигар бахшҳо таъкид гардид.”

Айни замон ба қавли дафтари матбуоти президенти Тоҷикистон ду тараф ҳамчунин “доир ба масоили минтақавию байналмилалии мавриди таваҷҷуҳи муштарак “ гуфтугуи судманде доштаанд.

Исмоил Бақоӣ, сухангӯи вазорати умури хориҷии Эрон гуфтааст, ки мавзуҳои суҳбат ҳамкориҳои дуҷониба ва таҳаввулоти минтақавӣ ва байналмилалӣ аст.

Вазорати умури хориҷии Тоҷикистон ҳам гуфт, ки зимни мулоқоти Сироҷиддин Муҳриддин бо Сайид Аббос Ароқчӣ "ҷонибҳо вобаста ба ҳолати кунунӣ ва дурнамои рушди муносибатҳои Ҷумҳурии Тоҷикистон ва Ҷумҳурии Исломии Эрон дар соҳаҳои иқтисоду тиҷорат ва ҳамкориҳо дар доираи созмонҳои байналмилаливу минтақавӣ табодули назар намуданд."

Тоҷикистон моҳи июн ҳамлаҳои Исроил ва Амрико ба таъсисоти атомии Эронро маҳкум карда ва аз ҷумла гуфта буд, ки “шиддат гирифтани муноқиша метавонад боиси табдил ёфтани низои кунунӣ ба ҷанги давомдор бо пайомадҳои хатарнок барои кулли минтақа ва ҷаҳон гардад.”

Заминларзаи қавиии 8.8 дараҷаӣ рӯзи 30-уми июл нимҷазираи Камчаткаи Русияро такон дод, ки сахттарин зилзила пас аз соли 2011 ба ҳисоб меравад. Мақомот дар чанд кишвар аз хатари бархостани сунамӣ ва ё мавҷҳои азим аз уқёнус ҳушдор доданд, аз ҷумла дар худи Камчатка, Ҷазираҳои Курил дар Русия, ҷазираи Ҳавайӣ дар Амрико ва Ҷопону Зеландияи нав.

Дар Северо-Курилск як корхонаи коркарди моҳӣ ва бандар зери об мондаанд ва киштиҳо низ аз лангарашон канда шуда ба об рафтаанд. Дар Камчатка девори кӯдакистоне вайрон шудааст, вале касе осеб надидааст.

Дар ҷазираи Ҳонолулу ва Ҳавайӣ мошинҳои зиёде дар роҳ банд мондаанд, чун мардум аз бими сунамӣ аз соҳилҳо мегурезанд, то дар баландиҳои амн паноҳ ёбанд. Дар Ҷопон мавҷҳои азим чанд наҳанги бузургро ба соҳил андохтаанд. Маркази зилзиласанҷии Русия гуфт, мумкин аст, пасларзаҳо то як моҳи дигар идома кунанд ва то ба 7.6 дараҷа бирасанд, ки ин гуна заминларза ҳам сабаби сунамӣ мешавад.

Туркия мумкин аст чанд гумонбари ҳамла ба "Крокус"-ро ба Русия супорад, ки ҳадди ақал се нафарашон шаҳрванди Тоҷикистон ҳастанд. Дар ин бора хабаргузории русии ТАСС бо такя ба яке аз вакилони дифои ҷабрдидагон гузориш додааст.

Ба қавли ин манбаъ, яке аз афроде, ки мумкин аст аз Туркия ба Русия истирдод шавад, Муҳаммадраҳим Файзов, бародари Муҳаммадсобир Файзов, яке аз гумонбарони асосии парвандаи "Крокус" аст.

ТАСС навиштааст, Муҳаммадраҳим Файзов қабл аз ҳамла ба толори консертӣ ба Русия омада, чанд муддат бо ду гумонбари асосии ин қазия Саидакрам Раҷабализода ва Фаридуни Шамсиддин зистааст. Пайвандони ин шаҳрвандони Тоҷикистон, аз ҷумла Муҳаммадсобир Файзов ба ҳамлаварони асосӣ будани онҳо шубҳа доранд.

Хабаргузории ТАСС навиштааст, Умедҷон Солиев, шаҳрванди дигари Тоҷикистон ҳам эҳтимол ба Русия супорида шавад. Ба қавли ин манбаъ, Солиев ҳамлаваронро бо силоҳ таъмин кардааст. Умедҷон Солиев ба қавли ин расонаи русӣ, дар Тоҷикистон бо иттиҳоми ғоратгарӣ таҳти пайгард аст.

Ҳамчунин Зубайдулло Исмоилов, зодаи дигари Тоҷикистон ҳам ба даст доштан дар ҳамла ба "Крокус" муттаҳам мешавад. ТАСС навиштааст, ки Исмоилов қаблан бо иттиҳоми даъват ба сарнагунии ҳокимият дар Тоҷикистон зиндонӣ шуда буд.

Тасдиқии дурустии ин ҳарфҳо феълан мушкил аст.

ТАСС навиштааст, ки ҳамаи гумонбароне, ки ҳоло дар Туркия ҳастанд, то ҳамла ба "Крокус", хоки Русияро тарк карданд.

Ин расона ҳамчунин гузориш додааст, ки мақомоти Тоҷкистон ва Қирғизистон 9 нафарро дар пайванд ба ҳодисаи "Крокус" ҷустуҷӯ доранд.

Моҳи январи имсол додситонии Туркия алайҳи панҷ хориҷӣ, ки ба қавли муфаттишон бо тоҷикони гумонзад ба ҳамла ба толори "Крокус"-и Русия тамос доштаанд, айбнома эълон кард.

Ба Ҳофизҷон Усмонов, Мутеулло Асоев, Раҳматулло Солиҳов, Муҳаммадраҳим Файзов ва Ҳамза Муҳаммад то понздаҳ сол зиндон таҳдид мекунад.

Дар ҳамлаи террористӣ ба толори консертии Крокус дар канори Маскав дар рӯзи 22-уми марти соли 2024 149 нафар нафар кушта ва 609 каси дигар маҷруҳ шуданд. Дар умум мақомоти Русия 19 нафарро ба анҷоми ин ҳамла муттаҳам мекунанд ва аксари онҳо шаҳрвандони Тоҷикистон ҳастанд.

Гуруҳи ба ном "Давлати исломӣ" дар он замон масъулияти ин ҳамларо бар уҳда гирифт, аммо мақомоти Русия гуфтаанд, ки муҳоҷирони тоҷик ҳамлаи террористиро бо амри Хадамоти махсуси Украина анҷом додаанд. Иддаое, ки ин кишвар рад кардааст.

Шеваи боздошту латӯкуби бераҳмонаи чор муҳоҷири тоҷик баъди ҳамла, сабаби хашми мардум шуд ва ин шубҳаву гумонро барангехт, ки шаҳрвандони Тоҷикистон зери шиканҷа гуноҳи нокардаро ба гардан гирифтаанд.

Додгоҳи ноҳияи Басманнийи шаҳри Маскав, Шарофиддин Гадоев, яке аз мухолифони ҳукумати Тоҷикистонро дар ғайбаш ба 8,5 сол зиндон маҳкум кардааст.

Додгоҳ 29-уми июл Гадоевро ба он гунаҳкор кардааст, ки дар бораи артиши Русия ва ҷанги ин кишвар алайҳи Украина, хабарҳои дурӯғ паҳн кардааст.

Вокуниши Шарофиддин Гадоев ба ин ҳукм маълум нест, аммо ӯ қаблан гуфта буд, ки парвандаи ҷиноӣ дар Русия ба фаъолиятҳои сиёсиаш, бахусус тарафдорӣ аз Украина, рабт дорад.

Шарофиддин Гадоев, роҳбари Ҷунбиши ислоҳот ва рушди Тоҷикистон аст ва дар Ҳолланд паноҳандагии сиёсӣ дорад.

Расонаҳоии русӣ навиштаанд, ки парвандаи ҷиноӣ алайҳи Гадоев ва "ифротгаро" шинохта шудани ӯ аз сӯи додгоҳе дар Маскав, метавонад барои тоҷикистониҳое, ки ба саҳифаҳои ӯ дар шабакаҳои иҷтимоӣ обуна шудаанд, мушкилӣ эҷод кунад.

Мақомоти Русия бар пояи як суҳбати Шарофиддин Гадоев дар шабакаи ютубии "Ислоҳ" нисбати ӯ парвандаи ҷиноӣ кушоданд. Дар ин суҳбат, ки соли 2022 пахш шуд, Гадоев нақл мекунад, ки чигуна низомиёни Русия шаҳрвандони оддиро дар Украина мекушанд.

Ду зодаи Тоҷикистон дар додгоҳи Маскав алайҳи Шарофиддин Гадоев шаҳодат дода ва гуфтаанд, ки гӯё ӯ дар бахши тоҷикии интернет ба таблиғоти зидди Русия машғул аст.

Қаблан модари Шарофиддин Гадоевро бо дархости Хадамоти федероли амнияти Русия ё ФСБ бозпурсӣ карда буданд.

Ба ҷуз Шарофиддин Гадоев, мақомоти Русия Муҳаммадиқболи Садриддин, мудири пойгоҳи "Ислоҳ"-ро низ бо иттиҳоми нашри ахбор дар бораи артиши Русия ғоибона ба зиндон маҳкум кардаанд.

Қарор аст, фардо 30-уми июл Аббос Ароқчӣ, вазири умури хориҷии Эрон ба Душанбе сафар кунад. Дар ин бора хабаргузории давлатии “Ховар” бо такя ба суханони Шоҳин Самадӣ, сухангӯи вазорат иттило додааст.

Дар хабар омадааст, ҳангоми сафари расмӣ ба Тоҷикистон, Аббос Ароқчӣ бо Эмомалӣ Раҳмон, раиси ҷумҳур ва Сироҷиддини Мӯҳриддин, вазири умури хориҷӣ ва дигар раҳбарони баландпояи кишвар дидору гуфтугу кунад.

Дар бораи масоили баррасӣ дар ин дидорҳо хабаре надодаанд, вале аввали ҳамин моҳ вазирони умури хориҷии ду кишвар дар як суҳбати телефонӣ дар бораи робитаҳои дуҷониба суҳбат карданд. Ҳамкориҳои Тоҷикистону Эрон дар чанд соли ахир, баръакси солҳои пеш тавсиа ёфтаанд.

Тоҷикистон моҳи июн ҳамлаҳои Исроил ва Амрико ба таъсисоти атомии Эронро маҳкум карда ва аз ҷумла гуфта буд, ки “шиддат гирифтани муноқиша метавонад боиси табдил ёфтани низои кунунӣ ба ҷанги давомдор бо пайомадҳои хатарнок барои кулли минтақа ва ҷаҳон гардад.”

Бино ба гузориши расонаҳои Русия, Абдураҳмон Раҳимов раиси Ҷамъияти тоҷикон дар Уфа дар боздоштгоҳи ин шаҳр даргузаштааст. Ба навиштаи вебсайти “Честний репортаж», аҳволи Абдураҳмон Раҳимови 68-сола баъди ҳаммом гирифтан дар боздоштгоҳ бад шудааст ва бо вуҷуди кӯмаки тиббӣ, ӯ ҷон додааст.

Ба навиштаи нашрия, табибон нишонае аз “марги маҷбурӣ” дар бадани ӯ наёфтаанд ва сабаби фавтро “марги табиӣ” навиштаанд. Замони дақиқи марги ӯро нагуфтаанд. Абдураҳмон Раҳимов соли 2023 бо иттиҳоми тамаъҷӯӣ аз кормандони бозор боздошт ва моҳи гузашта ба 13 соли зиндон маҳкум шуд. Мақомот дар Тоҷикистон дар ин бора ҳеҷ хабаре нашр накардаанд ва телефонҳои консулгарии Тоҷикистон дар шаҳри Уфаро ҳам рӯзи сешанбе касе намебардошт.

Абдураҳмон Раҳимов бино ба навиштаи расонаҳои Бошқирдистон аз соли 1993 муқими шаҳри Уфа буда, дар ин ҷумҳурии Русия Маркази фарҳангии тоҷикон ба номи Исмоили Сомонӣ ва созмони “Пайванд-1”-ро раҳбарӣ мекард. Ба қавли ин нашрияҳо ӯ “бо вуҷуди иттиҳоми қонуншиканӣ, дар миёни соҳибкорон ва ҷамъияти тоҷикон эҳтирому обрӯи зиёд дошт”.

Пруфи.ру яке аз вебсайтҳои Бошқирдистон навиштааст, ки Раҳимов дар бозори Затонский соҳиби ширкатҳои тиҷоратӣ буд ва ба тоҷирон қарз дода, сипас аз онҳо пули зиёд тамаъ мекардааст. Расонаҳои Русия назари вакили дифо ва ё худи Раҳимов дар замони муҳокима дар додгоҳро наовардаанд.

Шатранҷбозони тоҷик дар мусобиқоти қаҳрамонии шоҳмоти Осиёи Марказӣ байни наврасон, ки рӯзҳои 20-28-уми июл дар шаҳри Чолпон-Отаи Қирғизистон баргузор шуд, ду медал (як тилло ва як биринҷӣ) ба даст оварданд.

Ба иттилои Иттиҳоди шоҳмоти Қирғизистон, дар мусобиқоти қаҳрамонии Осиёи Марказӣ беш аз 400 шатранҷбози навраси синашон аз 8 то 18-сола аз Қазоқистон, Қирғизистон, Тоҷикистон, Туркманистон ва Узбекистон иштирок карданд.

Ба ҳайати дастаи Тоҷикистон 17 шатранҷбози наврас, аз ҷумла 10 писар ва 7 духтар, шомил буданд.

Ҷалолиддин Илҳомӣ дар сабқати шатранҷбозони то 18-сола барандаи медали тилло гардид. Намояндаи дигари Тоҷикистон Муродалӣ Сайфиев дар сабқати шатранҷбозони то 8-сола соҳиби медали биринҷӣ шуд.

Мусобиқот бо дастгирии Федератсияи байналмилалии шоҳмот (FIDE) ва Федератсияи шоҳмоти Осиё баргузор шуда, мақоми мусобиқоти интихобӣ бо ҳуқуқи додани унвонҳои байналмилалии варзиширо гирифтааст. Фонди ҷоизавии мусобиқот 12 ҳазор долларро ташкил медод.

Илҳом Юнусов, муовини раиси Федератсияи шоҳмоти Тоҷикистон, аҳамияти иштироки шатранҷбозони наврасро дар мусобиқоти байналмилалӣ таъкид намуда, гуфт, "чунин мусобиқот дар рушду густариши маҳорати шатранҷбозон нақши калидӣ дошта, имкон медиҳад, ки онҳо таҷрибаи пурарзиш касб карда, дар минтақа ном бароранд".

Додситон ё айбдоркунандаи давлатӣ аз Додгоҳи ҳарбии Хатлон талаб кардааст, ки як сарбози Нерӯҳои марзбонӣ барои марги ҳамхизматаш 11 сол зиндонӣ шавад.

Моҳи апрели соли 2025 ҳангоми навбатдорӣ дар сарҳади Тоҷикистону Афғонистон, Сунатулло Қодиров аз тири туфанг ба ҳалокат расида буд.

Бо гумони даст доштан дар марги ӯ, ҳамхизматаш Асадулло Қурбонов боздошт шудааст.

Хонаводаи сарбози кушташуда мегӯянд, додситон барои Асадулло Қурбонов 11 сол зиндон талаб кардааст. Додгоҳи ҳарбии Хатлон 29-уми июл ҳукми худро дар ин парванда содир мекунад.

Додситонии низомӣ баъди тафтиши қазия гуфтааст, сабаби марги Сунатулло Қодиров, аз беэҳтиётӣ тир андохтани ҳамхизматаш будааст, аммо падари сарбоз ба ин фарзия бовар надорад.

Падари сарбози кушташуда аз рафти тафтишот розӣ нест ва мегӯяд, дар марги писараш эҳтимолан касони дигар ҳам даст доранд. Додситонии ҳарбӣ гуфтааст, ин даъвои падар тасдиқ нашуд.

Марги сарбозони тоҷик дар сафи нерӯҳои мусаллаҳ ҳодисаи нав нест. Дар гузашта ҳам дар натиҷаи тасодуфу муноқиша ба ҳалокат расидани сарбозон сабт шуда буд.

Вазорати энержӣ ва захираҳои оби Тоҷикистон рӯйхати қарздорони калон аз истифодаи барқро нашр кардааст.

Дар гузориши Вазорат омадааст, аз ҳама зиёд аҳолӣ аз истифодаи барқ қарздор ҳастанд. Ба иттилои расмӣ, то аввали моҳи июли имсол, қарзи аҳолӣ аз истифодаи барқ қариб ба 1,7 миллиард сомонӣ расидааст. Омори мақомот дар бораи қарздории аҳолӣ аз барқ солҳост, ки шубҳаву гумонҳоеро ба миён овардааст.

Хабарнигорон борҳо ин мавзӯъро бо намояндагони ширкати "Барқи тоҷик" баҳс кардаанд. Намояндагони "Шабакаҳои тақсимоти барқ" пештар гуфта буданд, беш аз 1 миллиард сомонӣ, қарзе мебошад, ки солҳои гузашта ҷамъ шудааст. Мустақилона тасдиқ кардани ин ҳарфҳо феълан мушкил аст.

Ба иттилои Вазорати энержӣ ва захираҳои оби Тоҷикистон, баъди аҳолӣ калонтарин қарздор аз барқ "Ширкати Алюминийи Тоҷик" мебошад, ки қарзаш ба 718 миллион сомонӣ расидааст.

Оҷонсии беҳдошти замин ва обёрӣ бо 238 миллион сомонӣ, ташкилоту муассисаҳои буҷетӣ бо 108 миллион ва Корхонаҳои обу корез бо 16,4 миллион сомонӣ, аз қарздорони калон дар назди идораи барқ будаанд.

Таҳқиқи парвандаи мураббии кӯдакистон дар Душанбе, ки баъди марги як тифл боздошт шуда буд, ба анҷом расидааст. Дар ин бора намояндагони Вазорати маориф ва илми Тоҷикистон 28-уми июл зимни нишасти хабарӣ иттилоъ доданд.

Намояндагони Вазорат бидуни овардани ҷузъиёти бештар гуфтанд, парванда ба додгоҳ фиристода шудааст.

Рӯзи 19-уми май дар кӯдакистони " Саволу ҷавоб" – и шаҳри Душанбе Судайси дусола ба ҳалокат расид. Навори ҷон кандани ин кӯдак, ки ба панҷараи рахти хоб овезон шуда буд, вокунишҳои зиёдро дар шабакаҳои иҷтимоӣ ба миён овард.

Раҳим Саидзода, вазири маориф ва илми Тоҷикистон 28-уми июл дар ҳузури хабарнигорон гуфт, фаъолияти кӯдакистони " Саволу ҷавоб" ғайриқонунӣ буд. Ба гуфтаи вазир, иҷозатномаи ин кӯдакистон дар аввали сол ба анҷом расида будааст.

"Инҳо ғайриқонунӣ фаъолият кардагианд. Инро бояд шӯъбаи маорифи ноҳияи Сино, ки муассиса вобастаи он аст, назорат мекард, ки чаро бидуни иҷозатнома фаъолият кардааст. Дар ҳоли ҳозир аз рӯйи маълумоте, ки мо дорем, фаъолият надорад. Он камбудиҳое, ки доштанд, онҳоро бояд бартараф кунанд, ва аз сари нав ҳуҷҷатҳояшонро барои дастрас намудани иҷозатнома бояд пешниҳод кунанд,"-афзуд Вазири маориф.

Дар пайванд ба марги писари дусола, мураббии ӯро боздошт карда буданд. Ба гуфтаи Вазорати корҳои дохилӣ, мураббӣ вазифаи худро дуруст иҷро накарда вақти хоби кӯдакон онҳоро танҳо гузоштааст. Дар натиҷа "аз беэҳтиётӣ писарбачаи 2-сола аз гарданаш дар панҷараи рахти хоб овезон шуда ба ҳалокат расидааст".

Хонаводаи тифли ҳалокшуда мегӯянд, ба ҷуз мураббӣ, нисбати 5 нафари дигар, аз ҷумла мудири кӯдакистон парванда боз шудааст. Хонаводаи Судайси дусола аз рафти тафтиши парванда шикоят надоранд ва умедворанд, ки додгоҳ нисбати муттаҳамон ҳукми одилона содир мекунад.

Видеоро инҷо бинед:

Embed ба дигарон фиристед

Вазир мегӯяд, кӯдак дар муассисаи тарбиявие фавтид, ки иҷозатномаи фаъолият надошт

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:59 0:00

Назари хонаводаи мураббии боздоштшуда ба қазия маълум нест. Мақомоти тафтишотӣ ва додгоҳ низ то ҳол парвандаи дигар боздоштшудаҳоро шарҳ надодаанд. Тамосҳои хабарнигори Радиои Озодӣ барои гирифтани шарҳи бештар бенатиҷа буд. Ҳамчунин рӯшан нест, ки чаро кӯдакистон бидуни иҷозатномаи расмӣ фаъолият мекардааст? Масъулини кӯдакистон аз шарҳи мавзӯъ худорӣ мекунанд.

Ба иттилои расмӣ, дар Тоҷикистон 744 кӯдакистон фаъолият доранд ва 114 ҳазор кӯдакро нигоҳубин мекунанд. Нигарониҳои волидон аз беэътиноӣ ба қоидаҳои нигоҳубин ва шароити кӯдакстон дар гузашта борҳо садо додааст, вале ин бори аввал аст, ки як тифл ба ҳалокат расад.

Тоҷикистон барои таҳсили муҳассилини афғонистонӣ дар мактабҳои олии кишвар, 25 бурсия ҷудо кардааст. Дар ин бора Муҳаммад Зоҳир Ағбар, сафири ҳукумати пешини Афғонистон дар Фейсбук хабар додааст.

Сафир навиштааст, ки дар вақти интихоби довталабон ба духтарон бартарӣ дода мешавад. Зоҳир Ағбар нагуфтааст, ки бурсияҳои таҳсил барои хонандагони мактаби "Сомониён" дар кадом риштаҳо ҷудо шудаанд. Мақомоти Тоҷикистон ҳам дар ин бора хабар надодаанд.

Тибқи оморҳои нашршуда, имсол шумори квотаҳои ҷудошуда барои муҳассилини афғонистонӣ дар Тоҷикистон назар ба солҳои гузашта камтар аст. Тоҷикистон дар соли таҳсили 2023-24 барои шаҳрвандони Афғонистон чил бурсия ҷудо карда буд, вале имсол 25 адад.

То суқути Афғонистон ба дасти "Толибон", беш аз 1000 донишҷӯйи афғонистонӣ дар донишгоҳҳои Тоҷикистон мехонданд. Вале ҳоло шумори онҳо хеле кам шудааст.

Тоҷикистон дар нимаи аввали соли равон ба кишварҳои ҳамсояаш 1,1 миллиард киловат соат барқ фурӯхтааст, ки дар қиёс ба ҳамин давраи соли гузашта 56 дарсад бештар мебошад.

Ба гузориши Вазорати энергетика ва захираҳои оби Тоҷикистон, кишвар аз ҳисоби фурӯши барқ 322,6 миллион сомонӣ ё 33,8 миллион доллар ба даст овардааст.

Вазорат гуфтааст, бахши асосии барқ ё 718 миллион киловат соат ба Афғонистон ва боқимонда 395 миллион киловат ба Узбекистон интиқол ёфтааст.

Дар гузашта танқидҳое садо дода буд, ки мақомоти Тоҷикистон бигзор аввал шаҳрвандони кишварро бо барқ таъмин кунанд ва сипас барқи зиёдатиро ба хориҷ фурӯшанд. Вазорати энергетика зоҳиран дар посух ба ин интиқод навиштааст, 90 дарсади барқ дар моҳҳои май-июн ва дар давраи зиёд гардидани резиши об дар дарёҳо ба хориҷ интиқол дода шудааст. Радиои Озодӣ мустақилона ин маълумотро тасдиқ карда наметавонад.

Сокинони Тоҷикистон дар фаслҳои тирамоҳ ва зимистон бо маҳдудият барқ мегиранд. Сокинони чандин минтақаи Тоҷикистон шикоят доранд, ки имсол дар фасли тобистон ҳам пурра бо барқ таъмин нестанд. Далер Ҷумъа, вазири энергетикаи Тоҷикистон 25-уми июл дар нишасти хабарӣ маҳдудияти барқ дар фасли тобистонро тасдиқ кард ва сабаби онро ба таъсири гармои зиёд ба таҷҳизотҳои барқрасонӣ гуфт.

Далер Ҷумъа, вазири энергетикаи Тоҷикистон маҳдудияти барқро дар фасли тобистон тасдиқ намуда, сабаби онро таъсири гармиҳои ахир ба таҷҳизотҳои энергетикӣ гуфт.

Вазир 25-уми июл зимни нишасти хабарӣ дар Душанбе гуфт, “дар ҳақиқат, махсусан дар моҳи июл ва қисман дар моҳи июн дар баъзе мавридҳо маҳудудияти барқ ҷой дошт. Новобаста аз он, ки иқтидорҳои истеҳсолии энергияи барқ басанда буданд, азбаски ҳаво бисёр гарм буд, таъсири технологӣ ба кори таҷҳизотҳо, махсусан дар шабакаҳои барқӣ расонида буд.”

Ба гуфтаи Далер Ҷумъа, маҳдудияти интиқоли барқ асосан дар вилояти Суғд ҷой дошт ва бо ба кор даромадани дастгоҳҳои нав, таъмини мардум бо барқ беҳтар хоҳад шуд.

Санҷиши дурустии ҳарфҳои Вазири энергетика аз манобеи мустақил феълан ғайриимкон аст.

Дар охири моҳи июн ва аввали июл даҳҳо тан ба Радиои Озодӣ шикоят карданд, ки ҳамарӯза аз 2 то 6-7 соат барқи онҳоро хомуш мекунанд. Чунин шикоятҳо аз Панҷакент, Деваштич, Ваҳдат, Шаҳритус, Фархор ва ҳатто шаҳри Душанбе расидаанд. Суоли асосии сокинон ин буд, ки агар баҳонаи қатъи барқ дар зимистон камобӣ буд, аммо дар тобистон чаро барқро бо реҷа медиҳанд?

Вазири энергетикаи Тоҷикистон мегӯяд, ҳоло дигар маҳдудияти интиқоли барқ нест. Вале сокинон шикоят доранд, ки қатъи нерӯи барқ дар баъзе маҳаллаҳо то ҳол ба назар мерасад.

Ҳамасола, Тоҷикистон дар фасли сармо аз моҳи октябр то моҳи апрел реҷаи маҳдудияти интиқоли барқро, ки дар миёни мардум бо "лимит" машҳур аст, ҷорӣ мекунад ва далели онро паст шудани сатҳи об дар обанбори неругоҳи "Норак" унвон мекунад. Мардум дар ин давра аз камбудӣ барқ ва мушкилоти вобаста ба он зиёд шикоят мекунанд.

Аммо мақомоти Тоҷикистон мегӯянд, ки дар фасли тобистон барқро барзиёд истеҳсол мекунад ва ҳатто онро ба Афғонистон ва Узбекистону Қирғизистон мефурӯшанд.

Талаботи солонаи Тоҷикистон дар умум 19 миллиард киловат соат нерӯи барқ гуфта мешавад.

Тибқи иттилои расмӣ, дар нимаи аввали соли равон, дар Тоҷикистон 11,8 миллиард киловат соат нерӯи барқ тавлид шудааст.

Дар нимаи аввали соли равон ба буҷаи Тоҷикистон аз ҳисоби ҷарима ва дигар муҷозотҳо, 269,4 миллион сомонӣ ё 28,2 миллион доллар ворид шудааст. Ин маблағ аз пешбинии мақомот 84 миллион сомонӣ ё 8,8 миллион доллар бештар будааст. Ин оморҳо дар як гузориши Вазорати молияи Тоҷикистон нашр шудаанд. Радиои Озодӣ 27-уми июл бо ин гузориш шинос шуд.

Мақомот шарҳ надодаанд, ки дар нимаи аввали имсол сокинон бештар барои кадом қонуншиканӣ ҷарима шудаанд. Дар Тоҷикистон шикоятҳо аз ҷаримаҳои зиёд ва ҳангуфт борҳо садо додааст.

Ба гузориши Вазорати молияи Тоҷикистон, нақшаи даромади буҷаи кишвар дар нимаи аввали соли равон барзиёд иҷро шудааст. Дар ним сол ба буҷаи Тоҷикистон ба ҷойи 24,6 миллиард сомонӣ, 27,4 миллиард сомонӣ ворид шудааст.

Дар гузориши Вазорати молия омадааст, дар нимсолаи аввал ба ҷуз андоз аз фурӯш, нақшаи дигар намуд молиётҳо барзиёд иҷро шудааст.

Буҷаи Тоҷикистон асосан аз ҳисоби молиёт (андоз) ва боҷҳои гумрукӣ пур мешавад. Соҳибкорон борҳо аз андози баланд ва ҷаримаҳои ҳангуфт шикоят кардаанд.

Оҷонсии зидди фасоди Тоҷикистон аз боздошти як корманди идораи андози ноҳияи Сино хабар додааст. Ба иттилои манбаъ, ин корманд, барои қатъ кардани фаъолияти соҳибкорӣ аз як нафар 55 ҳазор сомонӣ пора талаб карда, қариб 50 ҳазор сомониашро гирифтааст. Назари ин корманд, ки аз ӯ Латифов У. ном бурда шудааст, ба иттиҳом маълум нест.

Дар хабарномаи Оҷонсии зидди фасод омадааст, мутахассиси идораи андоз баъди гирифтани маблағи ниҳоӣ боздошт шуд.

Оҷонсии зидди фасод хабар додааст, ки парвандаи Латифов У. бар асоси моддаи 319-уми Кодеси ҷиноӣ (гирифтани пора) ба додгоҳ фиристода шудааст. Ин банди қонун ҷарима ва ё то 5 сол зиндонро пешбинӣ мекунад.

Фасод аз мушкилиҳои асосии Тоҷикистон гуфта мешавад ва солона даҳҳо корманди давлатӣ, аз ҷумла кормандони мақомоти ҳифзи ҳуқуқ ва мизи ҳарбӣ бо ҷурми гирифтани пора дастгир мешаванд.